II International Quantum Business Conference

Os días 17 e 18 de decembro, o Pazo de Congresos e Exposicións de Santiago de Compostela acolleu a segunda edición da International Quantum Business Conference 2025, un evento internacional no que se deron cita os principais actores do ecosistema cuántico. Investigadores, centros tecnolóxicos, empresas, universidades e administracións públicas compartiron espazo e coñecementos baixo un marco común: posicionar as tecnoloxías cuánticas e a intelixencia artificial como base da transformación dixital no ámbito da supercomputación.

Temas principais

Máis de 70 intervenciónes internacionais, clasificadas na súa maioría baixo as temáticas Business Track, Scientific Track e Technology Transfer Track, ofreceron aos asistentes unha panorámica global sobre a presenza das tecnoloxías cuánticas en diferentes ámbitos de aplicación e rexións xeográficas. Entre elas, destacaron:

• Casos de uso industriais: Expuxéronse aplicacións reais de tecnoloxías cuánticas en sectores estratéxicos como automoción, finanzas e saúde.
• Enfoques híbridos cuántico-clásicos: Abordouse a combinación da computación cuántica e clásica como vía para resolver distintos desafíos da actualidade.
• Quantum Flagship da CE: Destacouse a importancia dos centros de supercomputación como impulsores da innovación cuántica en territorio europeo.
• Colaboración entre a Unión Europea e Xapón: Tratouse a cooperación entre a Unión Europea e Xapón como condición de posibilidade para acelerar o desenvolvemento do ecosistema de forma adecuada.

Para tratar todas estas temáticas, contouse coa presenza dalgúns dos seus principais implicados: Shintaro Sato (director do Quantum Laboratory Fujitsu Research), Carmen Cotelo (directora da Axencia Galega de Innovación, GAIN), Román González (conselleiro de Educación, Ciencia, Universidades e FP da Xunta de Galicia), Lois Orosa (director científico do Cesga) e Almudena Justo (directora internacional do Quantum Center Fsas Technologies), entre outros.

Cesga e Quorum Spain, protagonistas

O Cesga colaborou, un ano máis, con Fsas Technologies (Fujitsu) e a Xunta de Galicia para trasladar á comunidade galega o estatus de referencia que tanto tempo leva traballando neste ámbito. Lois Orosa, director científico do centro, participou na primera mesa redonda aportando a súa visión sobre os centros de I+D como actores chave na próxima gran transformación tecnolóxica, impulsada pola converxencia entre a inteligencia artificial e a computación cuántica.

Andrés Gómez, administrador de aplicacións e proxectos do Cesga, tomou a palabra na presentación dos resultados do proxecto Quorum, o cal estivo desenvolvendo unha intensa actividade centrada na formación, na divulgación e na conexión co ecosistema cuántico en España, ao cal se adscriben entidades como o Cesga, Gradiant, a Xunta de Galicia, FsasTechnologies (Fujitsu), Fidesol, Itecam e QCentroid.

Sen esquecer o papel da Axencia Galega de Innovación (GAIN). A súa directora, Carmen Cotelo, fixo énfase nos fitos acadados este 2025: o mencionado proxecto Quorum, 1HealthAI Factory ou a participación na European Quantum Technologies Conference 2025 en Dinamarca.

En conclusión, a II International Quantum Business Conference destacou a influencia da computación cuántica na transformación industrial, salientando os casos de uso, as infraestruturas avanzadas e as sinerxías internacionais.